O CDG celebra o Día das Letras no Teatro Español de Madrid coa representación de ‘Divinas Palabras Revolution’ en galego

Volver

Esta produción da compañía pública, dirixida por Xron a partir do coñecido texto de Valle-Inclán, ofrecerá mañá a primeira das súas 11 funcións no escenario madrileño, onde se exhibirá con sobretítulos en castelán

A obra orixinal foi estreada hai 85 anos neste mesmo espazo, con escenografía deseñada por Castelao

Santiago de Compostela, 16 de maio de 2018.- O Centro Dramático Galego (CDG) celebrará mañá o Día das Letras en Madrid, coa primeira das 11 representacións de Divinas Palabras Revolution que terán lugar no Teatro Español ata o 27 de maio. Trátase da primeira adaptación ao galego da coñecida obra de Ramón María del Valle-Inclán, que tamén aquí será escenificada no noso idioma, con sobretítulos en castelán.

Ademais, esta versión contemporánea de Divinas palabras, que Xron dirixiu para o CDG, chega ao Teatro Español 85 anos despois da estrea da obra orixinal, que tivo lugar en 1933 nese mesmo espazo baixo a dirección de Cipriano Rivas Cherif, con escenografía deseñada por Castelao e con Margarita Xirgu como Mari-Gaila.

Nesta nova aproximación á obra de Valle, este papel está interpretado por Patricia de Lorenzo, como parte do elenco do que tamén forman parte Manuel Cortés (Pedro Gailo), Antón Coucheiro (Sétimo Miau), Borja Fernández (Migueliño), Mónica García (Marica do Reino), Tone Martínez (Candás), Victoria Pérez (Tatoola), Ánxela Ríos (Simoniña) e Tomé Viéitez (Laureano).

Na versión que asinan Manuel Cortés e Xron, con dramaturxia deste último, os devanditos personaxes son os concursantes dun programa de telerrealidade, durante o que teñen que convivir nunha casa-plató vixiados polas cámaras 24 horas. Deste xeito, a ‘traxicomedia de aldea’, como foi subtitulada a obra orixinal polo seu autor, convértese aquí en ‘traxicomedia de aldea global’.

Actividade pedagóxica con Xron

Con motivo da estadía do CDG en Madrid, o Teatro Español organiza unha actividade pedagóxica a modo de charla con Xron, que terá lugar o 23 de maio, ás 17,00 h. Nela, o director explicará o proceso de adaptación e montaxe desta versión “insconscientemente libre” de Divinas Palabras. A acción está dirixida a profesionais e estudantes de arte dramática e artes escénicas, así como a todas aquelas persoas interesadas na obra de Valle-Inclán, na actividade do Centro Dramático Galego ou no traballo do Grupo Chévere, ao que está vencellada parte do equipo artístico desta produción.

Tras a súa exhibición en Madrid, Divinas Palabras Revolution regresará a Galicia para continuar a súa xira o 1 de xuño no Barco de Valdeorras, 8 e 9 de xuño na Coruña, 14 de xuño en Pontevedra, 16 de xuño en Rianxo, 21 e 22 de xuño en Vigo e 29 de xuño en Cangas.

Para finalizar, o espectáculo regresará á sede do CDG no Salón Teatro de Santiago, onde ofrecerá catro últimos pases do 5 ao 8 de xullo, para lle dar resposta á boa acollida de público que tivo en Compostela durante o pasado mes de abril.
 

Departamento: C. de Cultura, Educación e Ordenación Universitaria Tema: Cultura, Lingua