Xogos de iniciación e primeiras cantarelas
Os dedos da man
Este foi ao monte,
este colleu leña,
este foi aos ovos,
este fritiunos
e este gordiño comeunos todos
O pai ou a nai van collendo en cada verso un dedo diferente
Para cabalgar na perna
Arre, cabalo,
que vas amontado.
Panza para arriba,
panza para abaixo
ata caer do cabalo… abaixo!
Para bebés que xa sentan sós. O neno cabalga na túa perna. Cando digas “abaixo!”, agarra del forte e simula que o deixas caer
Cóxegas con Pedro Chosco
Pedro Chosco, de onde vés?
Veño de lavar os pés.
Pedro Chosco, e a onde vas?
Vou durmir este rapaz.
Mentres se recita o segundo verso, facémoslle ao bebé cóxegas nos pés; mentres se recita o derradeiro, pola perna arriba.