Toponimízate 2019
Ponse en marcha un ano máis o programa de promoción da lingua galega Toponimízate. Falámosche dos nomes da túa terra. A acción enmárcase nos proxectos Toponimia de Galicia e GeoArpad, impulsados ambos os dous desde a Xunta de Galicia, e coordinarase desde a Real Academia Galega (RAG) en colaboración coa Secretaría Xeral de Política Lingüística.
A toponimia é a disciplina que estuda os topónimos ou nomes propios de lugar: os das aldeas e parroquias, os dos ríos e leiras, os dos penedos e fontes. Constitúe un aspecto fundamental do noso patrimonio que liga a lingua propia coa xeografía, a historia ou a arqueoloxía de noso.
Entre outubro e decembro de 2019 Toponimízate chegará a 15 concellos da Rede de Dinamización Lingüística: Noia, Mazaricos, Muxía, Ordes, Folgoso do Courel, Guitiriz, Taboada, Vilalba, Beariz, Manzaneda, Ribadavia, Cambados, Cerdedo-Cotobade, Lalín e Pazos de Borbén.
Estas localidades acollerán conferencias do filólogo Vicente Feijoo, especialista en toponimia e membro do Seminario de Onomástica da Real Academia Galega. Nelas falarase de toponimia galega (os motivos da abundancia de nomes de lugar no país, a toponimia galega como patrimonio inmaterial...) e tamén da propia de cada concello (significado dos nomes das parroquias e das aldeas; como consultar a toponimia xeorreferenciada de cada municipio no Buscador de topónimos; utilidades desta ferramenta...). Ademais, nos concellos que teñan sen recoller a súa microtoponimia -é dicir, os nomes de leiras, camiños, fontes, penedos...- mostrarase unha app que lles permitirá aos veciños e veciñas colaborar para rexistrar e subir á rede tanto os microtopónimos como as lendas a eles asociadas, de xeito que todos poidan colaborar na salvagarda deste patrimonio inmaterial que é o noso orgullo.
Obxectivos
Os obxectivos deste programa son múltiples e atinguen tanto á veciñanza coma aos técnicos municipais:
- Achegarlle á cidadanía de cada concello valiosa información sobre a historia do galego falado na súa contorna e sobre os modos de vida dos seus antepasados, os feitos hisóricos que foron relevantes para eles e as características da paisaxe no momento en que se bautizou cada anaco da súa terra ou cada braza do seu mar. Porque en Galicia todo está nomeado e cada nome ten unha historia que contar, un anaco de historia local que non figura nos libros e que aos veciños e veciñas lles gustará coñecer.
- Fornecer os técnicos municipais das ferramentas necesarias que lles faciliten a tramitación de expedientes relacionados coa planificación e xestión do territorio do termo municipal, nos que deben empregar os topónimos normalizados, así como a posta en valor e promoción turística da paisaxe e dos elementos do patrimonio material e inmaterial que posúen.
- Fomentar o uso da lingua galega entre a xente máis nova, pois promoverase que sexa esta a lingua en que interactuen cos seus avós e veciños para preguntarlles polos nomes de lugares e as lendas a eles asociados. Tamén empregarán o galego coas novas tecnoloxías para subir toda esa información a internet. Os topónimos naceron en galego e así deben usarse, tal como se manifesta no artigo 10 da Lei 3/1983 de normalización lingüística.
- Fomentar a presenza do galego nas tecnoloxías da información e da comunicación. A toponimia moderniza a nosa lingua, porque a imos traballar cunha APP que presentará as últimas novidades en sistemas de información xeográfica e porque abriremos unha ventá ao mundo a través de internet para dar a coñecer a singularidades de cada concello.
- Xerar dinámicas de traballo que promovan as relacións entre a sociedade, entre as asociacións veciñais e culturais e as administracións. Trátase de buscar a participación de toda a comunidade nun proxecto cultural común, facendo un traballo cooperativo entre varias xeracións, poñendo en valor a sabedoría dos máis vellos, a intrahistoria de cada concello e a conservación do patrimonio inmaterial (tradicións, folclore, coplas, lendas... asociadas aos topónimos). Isto creará un sentimento de identidade colectiva compartida e de continuidade.
Axenda de Toponimízate | |||
---|---|---|---|
Data e hora | Lugar | Concello | Provincia |
4 de novembro, 16:00 h | Casa da Cultura de Mazaricos | Mazaricos | A Coruña |
6 de novembro, 11:00 h | CEIP de Manzaneda | Manzaneda | Ourense |
8 de novembro, 18:00 h | Centro Social de Ribadavia | Ribadavia | Ourense |
12 de novembro, 10:45 h | IES Francisco Asorey | Cambados | Pontevedra |
15 de novembro, 19:00 h | Salón de plenos da Casa do Concello | Beariz | Ourense |
18 de novembro, 16:30 h | Casa da Cultura de Ordes | Ordes | A Coruña |
27 de novembro, 19:00 h | Telecentro. Aula Cemit | Guitiriz | Lugo |
28 de novembro, 20:00 h | Biblioteca Varela Jácome | Lalín | Pontevedra |
29 de novembro, 19:00 h | Casa da Cultura de Taboada | Taboada | Lugo |
30 de novembro, 12:00 h | Salón de plenos da Casa Consistorial | Carucedo | León |
4 de decembro, 10:30 h | Biblioteca Municipal | Muxía | A Coruña |
5 de decembro, 19:00 h | Casa da Cultura | Noia | A Coruña |
16 de decembro, 14:30 h | CPI Poeta Uxío Novoneyra | Folgoso do Courel | Lugo |
17 de decembro, 15:45 h | Sala de usos múltiples de Cerdedo | Cerdedo-Cotobade | Pontevedra |
19 de decembro, 12:30 h | Auditorio da Casa do Concello | Pazos de Borbén | Pontevedra |
27 de decembro, 20:00 h | Casa da Cultura de Vilalba | Vilalba | Lugo |