FALAREDES 2022
Tras os vieiros de Florencio
FalaRedes 2022 ábrese cunha peza teatral da compañía Fantoches Baj que mostra a traxectoria, a obra e mais a poética do autor homenaxeado este ano no Día das Letras Galegas: Florencio Delgado Gurriarán.
Este espectáculo de teatro de obxectos dirixido preferentemente a público adolescente e adulto parte dun documento excepcional sobre a vida do poeta valdeorrés, que é a longa entrevista que el lle concedeu a Dolores Pla en Agosto de 1979 na súa casa de Guadalaxara (México) para o Archivo de la Palabra. Os textos desta entrevista mestúranse en Tras os vieiros de Florencio cos poemas do autor, os cales xiran arredor de tres eixes: poesía galeguista, poesía festiva e paisaxística e poesía intimista.
No espectáculo ten moita importancia a banda sonora, creada a partir de temas tradicionais que gravou o guitarrista Antonio Bravo, especialista no Cancionero gallego de Bal y Gay.
SINOPSE
Na década dos 60, logo duns días exercendo de visitador farmacéutico pola contorna de Guadalaxara, Florencio D. Gurriarán chega á casa canso, cheo de sede e cargado co seu maletín. Ante a presenza inesperada dos espectadores describe o seu día a día de axente comercial pola rexión. Pouco a pouco, axudándose dos elementos que leva no maletín e embargado pola saudade, van aflorando as lembranzas do seu Córgomo natal, a guerra, a chegada ao seu país de acollida e algúns momentos festivos.
Tras os Vieiros de Florencio estará en abril e maio na Mancomunidade de Ordes e en 8 concellos da Rede de Dinamización Lingüística: Burela, Vilalba, O Carballiño, Xinzo de Limia, O Barco de Valdeorras, A Estrada, Sanxenxo e Lalín.
Axenda de FalaRedes 2022. Tras os Vieiros de Florencio | |||
Data e hora | Lugar | Concello | Provincia |
17 de abril, ás 18h | Auditorio Municipal | Vilalba | Lugo |
23 de abril, 21:30h | Auditorio Emilia Pardo Bazán | Sanxenxo | Pontevedra |
6 de maio, ás 20.30h | Salón Teatro | Lalín | Pontevedra |
7 de maio, ás 20h | Museo do Traxe de Ordes | Ordes (Coa colaboración da Mancomunidade de Municipios da Comarca de Ordes) | A Coruña |
8 de maio, 20h | Auditorio Manuel María | O Carballiño | Ourense |
15 de maio, 19h | Casa da Cultura | Burela | Lugo |
16 de maio, 19h | Teatro | A Estrada | Pontevedra |
17 de maio, 20h | Teatro Lauro Olmo | O Barco de Valdeorras | Ourense |
21 de maio, 20:00 h | Casa da Cultura | Xinzo de Limia | Ourense |