Volver

Premios aRi[t]mar 2022

Centro: EOI Santiago de Compostela, Santiago de Compostela (A Coruña)
Curso: 2021-2022

aRi[t]mar é un proxecto da Escola Oficial de Idiomas de Santiago de Compostela en colaboración coa Secretaría Xeral de Política Lingüística, que busca divulgar a música e a poesía galego-portuguesa actuais e achegar a cultura e a lingua dos dous territorios, no marco da Lei Valentín Paz-Andrade para o aproveitamento do ensino do portugués e os vínculos coa lusofonía.

Logo de rematar o prazo para seleccionar as mellores cancións galegas e portuguesas do ano 2021 propostas na primeira fase deste concurso, xa coñecemos as pezas gañadoras. Así, o público participante nas votacións decidiu que “Peixe”, de Xisco Feijóo, fose elixida Mellor Música do Ano 2021 en Galicia e “Andorinhas”, de Ana Moura, Mellor Música do Ano 2021 de Portugal. A segunda e terceira cancións máis votadas na categoría galega foron, respectivamente, “Pobo de Artistas” de Dakidarría, e “Maneo de Cambre”, de Caamaño&Ameixeiras. Na categoría lusa, a segunda e terceira cancións máis votadas foron “Estou por tudo”, de Miguel Araújo, e “Eco”, de Carolina Deslandes.

O xurado do certame aRi[t]mar galiza e portugal vén de decidir que a asociación Ponte... nas Ondas! será a galardoada co Premio Especial do Xurado á Embaixada da Amizade Galego-Lusófona 2022. É un recoñecemento outorgado por medio de resolución directa do xurado e pretende salientar o traballo de todo aquel que contribúe a achegar as culturas galega e portuguesa. A resolución dáse a coñecer o 25 de abril, data da Revolución dos Caraveis.