FALAREDES 2016
Todo me fala de ti
FalaRedes ábrese cunha actividade de dinamización lingüística que é tamén unha homenaxe a Manuel María, o autor a quen se lle dedica este ano o Día das Letras Galegas. Con ela, a Secretaría Xeral de Política Lingüística réndelle tributo ao poeta do pobo e fai partícipe desta celebración á Rede de Dinamización Lingüística.
Os recoñecidos músicos Uxía, Magín Blanco e Santi Cribeiro -que teñen mostrado a súa mestría para engaiolar o público infantil en traballos como María Fumaça, Rosalía pequeniña, A nena e o grilo ou Gatuxo- cantan os textos do poeta da Terra Cha nun concerto pensado para cativada de máis de 5 anos e as súas familias.
Deste xeito, ao tempo que difunden a obra de Manuel María entre a xente miúda, amplían o repertorio de música infantil en galego coas cancións do seu disco Canta o cuco. Todo me fala de ti ofrécenos, pois, temas bonitos e doados de aprender que se desfrutarán durante o concerto e que, con seguridade, se seguirán cantando na casa para que o galego estea presente no espazo familiar unha vez rematada a actividade.
Baixo xestión de Urdime Propostas Culturais, o espectáculo de dinamización lingüística chegará aos concellos de Ourense, Marín, Betanzos, A Coruña, Ferrol, Ribeira, Santiago de Compostela, Burela, Vilalba, O Carballiño, Ribadavia, Cangas, A Estrada, Vilagarcía de Arousa e Ponteceso (en colaboración coa Fundación Eduardo Pondal) de febreiro a maio de 2016.