NÓS CONTRA A VIOLENCIA
O rueiro das liortas
O espectáculo baséase na comedia da arte italiana e no teatro popular para promover, desde a óptica escénica, a reflexión sobre a situación desigual da muller na sociedade, ao tempo que se afonda nas relacións de parella e nas dificultades para manter vivo o amor. Dirixida a todos os públicos desde os oito anos de idade, esta comedia iniciática, vista desde unha óptica feminina, combina o dinamismo dos elementos escenográficos que representan diferentes espazos, un actor e unha actriz que interpretan múltiples personaxes e unha nena que fai valer a súa verdade. Ofrece, a maiores, un espazo de reflexión conxunta das persoas asistentes á función a partir dunha conversa posterior cos actores.
O Elefante Elegante crea espectáculos de teatro visual baseados tanto no texto coma no xesto e no movemento. As súas pezas, que buscan a universalidade, xorden da fusión de diferentes linguaxes: a palabra, o teatro físico, a danza, as artes plásticas e as artes visuais. Desta volta, ofrécennos unha obra de coidada estética na que as emocións, os afectos, o humor e o texto van da man para achegar a cativada e a mocidade ao teatro en lingua galega e sensibilizalas en contra da violencia de xénero, os micromachismos ou os comportamentos sexistas.
Axenda. O rueiro das liortas | |||
---|---|---|---|
Data e hora | Lugar | Concello | Provincia |
Sábado, 16 de novembro, 20:00 horas | Casa da Xuventude | Mondoñedo | Lugo |
Domingo, 17 de novembro, 19:00 horas | Auditorio Municipal | Baiona | Pontevedra |
Venres, 22 de novembro, 20:30 horas | Auditorio Constante Liste da Ramallosa | Teo | A Coruña |
Sábado, 23 de novembro, 21:00 horas | Auditorio Municipal | Caldas de Reis | Pontevedra |
Domingo, 24 de novembro, 19:30 horas | Centro Cultural A Fábrica | Oleiros | A Coruña |
Luns, 25 de novembro, 20:00 horas | IES Illa de Tambo | Marín | Pontevedra |
Venres, 29 de novembro, 20:30 horas | Centro Cultural e Recreativo A Pombiña do Pedroso | Narón | A Coruña |
Sábado, 7 de decembro, 20:00 horas | Teatro Lauro Olmo | O Barco de Valdeorras | Ourense |
Domingo, 8 de decembro, 20:00 horas | Casa Habanera | Guitiriz | Lugo |
Domingo, 15 de decembro, 19:00 horas | Casa da Cultura | Salvaterra de Miño | Pontevedra |