Este espectáculo nace da fusión entre o traballo que o actor Fran Rei vén desenvolvendo desde o ano 2017 no Obradoiro de Dramatización e Teatro da asociación Avante e da súa propia experiencia previa na creación e produción da peza Retrincos de Castelao, de Culturactiva Producións.

A partir de textos do xenio de Rianxo, principalmente procedentes das súas obras Cousas e Retrincos, actores e actrices con diversidade funcional comparten protagonismo cos profesionais Isabel Risco e Fran Rei, con quen poñen en escena unha proposta para todos os públicos que pasea, entre o drama e a comedia, pola maneira que tiña Castelao de ver a Galicia do seu tempo: as festas populares, as xentes do mar, a retranca, o idioma, a morte, o humor, o medo… temas locais e universais que se enfocan nesta obra desde a particularidade galega.

(Algunhas) Cousas de Castelao estará a partir de maio en sete concellos da Rede de Dinamización Lingüística: Tordoia, Cerceda, Ordes, Oroso, Santa Comba, Val do Dubra e A Baña.

Axenda de FalaRedes 2022. (Algunhas) Cousas de Castelao
Data e hora	Lugar	Concello	Provincia
Aprazado	Centro Cultural Fernando Casas de Novoa de Sigüeiro	Oroso	A Coruña
3 de xuño, ás 19:00 h	Casa da Cultura	A Baña	A Coruña
30 de setembro, ás 20:00 h	Auditorio Edificio Multiusos	Santa Comba	A Coruña
7 de outubro, ás 19:00 h	Auditorio Municipal	Val do Dubra	A Coruña
28 de outubro, ás 20:00 h	Casa da Cultura	Tordoia	A Coruña