Volver

IX Carreira Camiño das Letras

A Consellaría de Cultura, Educación, Formación Profesional e Universidades, por medio das secretarías xerais de Política Lingüística e de Cultura, en colaboración con Xurdir S.L., organiza a IX edición da Carreira Camiño das Letras, que busca unir a práctica deportiva coa conmemoración do Día das Letras Galegas e o simbolismo do Camiño de Santiago.

A IX Carreira Camiño das Letras, que como cada ano forma parte do calendario oficial da Federación Galega de Atletismo, constará de dúas probas absolutas nas que poderán participar atletas federados ou sen federar, unha de 15 km, que partirá ás 10:00 horas do Pico Sacro e percorrerá a Ruta da Prata ata a Cidade da Cultura, e outra de 5 km, que comezará ás 10:05 horas no Gaiás e seguirá un circuíto polo Bosque de Galicia.

Ademais, a partir das 12:00 horas, a rapazada tamén poderá participar desta celebración nalgún dos circuítos habilitados na Cidade da Cultura, que van desde a categoría sub 6 á sub 16.

As persoas interesadas en participar poderán inscribirse a través da páxina web www.carreirasgalegas.com ata o domingo 14 de maio ás 23:50 horas. Despois, poderán recoller os seus dorsais na sede de Bonaval Car o martes 16 do mesmo mes de 9:00 a 14:00 horas e de 16:00 a 20:00 horas, momento en que recibirán como agasallo un libro e o diploma Camiños das Letras.

A entrega de premios aos gañadores e gañadoras realizarase ao remate dos percorridos. Os tres primeiros clasificados das proba de 15 km e 5 km recibirán cadanseu trofeo máis un lote de libros; os tres primeiros clasificados de cada unha das restantes categorías recibirá un lote de libros, e o club federado e o colexio do que máis atletas rematen as probas recibirán un trofeo e un lote de libros.