Nun mar azul
A asociación Familias Azuis, en colaboración coa Secretaría Xeral de Política Lingüística, creou o videoclip Nun mar azul cuxo obxectivo é promover a diversidade en todos os ámbitos da vida, dende a diversidade lingüística ata a diversidade funcional.
O videoclip, con letra e música de Raquel e Chus Domínguez, está interpretado por Uxía, Magín Blanco, Gustavo Domínguez, Isaac Palacín e mais Pablo Ces e conta coa colaboración dos nenos e nenas do Morrazo. É unha creación de OliconH, con animación de Nacho Laya e pictogramas en galego deseñados por Paxi da Silva. Foi gravado na praia de Pinténs (Cangas, Pontevedra) .
Familias Azuis convida a espallar polas redes sociais este audiovisual de xeito que, entre todos, creemos na web un gran mar azul que convide a sociedade a achegarse ás persoas con TEA (trastorno do espectro autista), facer un esforzo de comunicación e de ruptura de barreiras con elas e apreciar as súas potencialidades.
O vídeo será presentado o día 3 de decembro, Día da Discapacidade, no stand da Xunta de Galicia no Culturgal ás 17:30 horas.
A asociación Familias Azuis, creada este 2017, ten o obxectivo de lograr o benestar das persoas con TEA.