Reunido o xurado do premio, acordou concederlle o premio individual a Hadrián Félix Neira Varela, estudante de 2º de Bacharelato do IES Eduardo Pondal, de Ponteceso, polo traballo presentado baixo o pseudónimo Palaseu e co lema “Granito”.

O premio colectivo recaeu na clase de 2º de Bacharelato dese mesmo centro que, baixo o pseudónimo O Clan dos Pedrayo, entregou un interesante traballo no que afondan no estudo da etnografía, das construcións populares e da arquitectura tradicional da comarca Bergantiños.

Os premios entregaranse o vindeiro mes de marzo, cadrando co 134 aniversario do nacemento de Ramón Otero Pedrayo.

Convocatoria

Poderá participar calquera estudante ou grupo de estudantes de educación secundaria obrigatoria ou bacharelato, matriculados en calquera centro de Galicia no presente curso académico.

Concederanse os seguintes premios:

• Categoría individual:
  • Premio ao mellor traballo escrito ou audiovisual realizado por estudantes da ESO.
  • Premio ao mellor traballo escrito ou audiovisual realizado por estudantes de bacharelato.
• Categoría de grupo:
  • Premio ao mellor traballo escrito ou audiovisual realizado por estudantes da ESO.
  • Premio ao mellor traballo escrito ou audiovisual realizado por estudantes de bacharelato.

O premio individual consistirá nun ordenador portátil e o premio de grupo nunha viaxe de estudos dunha xornada de duración, na que se abordarán contidos relacionados coa Xeración Nós e na que participará o grupo-aula gañador e ata tres docentes que colaborasen con este. Ademais, o profesorado, en representación dos centros premiados, recollerá unha colección de libros para a biblioteca do centro e un diploma acreditativo.

O prazo de presentación remata o 15 de xaneiro de 2022.