Moitos de vós xa coñecedes o proxecto Regueifesta, unha iniciativa que puxeron en marcha o curso 2015-2016 os EDLG dos IES Marco do Camballón e Maximino Romero de Lema coa regueifa como eixo dinamizador no ámbito da innovación lingüística.
Do 11 ao 13 de maio desenvolveranse en Santiago de Compostela algunhas das actuacións máis destacadas deste proxecto. Entre elas, o I Certame Enreguéifate e o II Encontro Regueifesta para escolares galegos e vascos que se celebrará o día 12, a partir das 10:30 h, no Auditorio de Galicia. A partir das 19.00 h poderedes asistir ao I Festival Boina e Txapela no Centro Xove da Almáciga.

Ademais do achegamento lingüístico e cultural entre o alumnado dos dous pobos, a xuntanza servirá para mostrar as súas excelentes habilidades dialécticas e musicais para improvisación oral en verso.