O Consello da Cultura Galega organiza, co apoio da Secretaría Xeral de Política, os XXV Encontros para a Normalización Lingüística, que se van desenvolver o martes, 17 de outubro, na súa sede do Pazo de Raxoi, en Santiago de Compostela. Este ano poñen o foco no ámbito socioeconómico e xirarán arredor do tema “Economía, lingua e sustentabilidade”.

Nesta xeira, as persoas asistentes terán ocasión de comprobar como unha actividade empresarial que valora a proximidade e a sustentabilidade atopa no uso do galego un elemento de potenciación. Tamén poderán dialogar con empresas que, pola súa actividade e a súa relación de servizo con outras, se converten en amplificadoras do uso da lingua.

Desde outra perspectiva, falarase dos dereitos de usuarios/as e consumidores/as. Cales son, cal o estado actual do seu cumprimento e como actuar para facelos efectivos. Sempre desde o encontro, cunha mirada crítica e á vez centrada na proposta de solucións. Unha iniciativa que ten como un dos seus obxectivos mellorar a presenza da lingua galega no tecido comercial e empresarial, desde as relacións laborais á comunicación, rematando no contacto coa clientela.