O pasado 3 de febreiro, o alumnado do Ciclo de Imaxe e Son do IES Maximino Romero de Lema de Baio-Zas presentou Ao son do rural. Trátase dun singular proxecto que pretende exaltar o patrimonio material e inmaterial do mundo rural a través das múltiples iniciativas programadas para os próximos meses: mostra de fotografías antigas, recompilación de léxico e regueifas, estudo dos muíños da zona, representación teatral de Taberna sen dono de Varela Buxán e obradoiros con foliadas entre outras moitas actividades.