Cen anos despois do seu pasamento, Xoán Vicente Viqueira volve estar presente nas aulas centenarias do IES Plurilingüe Eusebio da Guarda. As múltiples iniciativas organizadas por este instituto, xunto co CPI Cruz do Sar e outras entidades, serán moi útiles para que o alumnado destes centros e todas as persoas interesadas no autor poidan afondar na figura deste insigne galeguista e no legado intelectual que nos deixou.

Entre as actividades referidas está o Roteiro das Irmandades que se desenvolverá na Coruña o sábado, 30 de novembro, a partir das 17.00 h. O paseo iniciarase no IES Plurilingüe Eusebio da Guarda, instituto no que Xoán Vicente exerceu como catedrático de Filosofía dende 1917 a 1924. Rematará na rúa Rego de Auga 38, sede da Real Academia Galega en 1916, ano no que nacen as Irmandades da Fala, das que Viqueira foi o seu primeiro conselleiro.

A duración aproximada é de hora e media. Non é necesaria a inscrición.