Para celebrar o Día Europeo das Linguas, a EOI de Ferrol convida a toda a comunidade educativa a tecer un mural colectivo. Cada persoa escribirá nunha tira de cor unha palabra que queira compartir, nunha lingua que fale ou estea a aprender, e engadirá o seu significado en galego. Despois entrelazará a tira cos fíos do tear instalado no vestíbulo.

O tear será o primeiro fío do proxecto Fíos de ida e volta: o galego no mundo. Durante o curso, o liño, o bordado, as postais, as historias, as conversas, a radio e a música darannos novas ocasións para tecer encontros. En todos eles queremos que o galego se escoite e se use: unha lingua coa que crear, conversar e compartir.