Publicación que dá a coñecer a Compostela de Ricardo Carvalho Calero, editada coa colaboración da Secretaría Xeral de Política Lingüística (SXPL) da Xunta de Galicia e de Ferega, que se ofrece tamén en formato dixital.

O autor, Xosé Ramón López Boullón, é filólogo especializado en lingua e literatura galega e toponimia e docente no CPR Plurilingüe Divino Maestro de Santiago de Compostela.

A través das máis de 250 páxinas, o autor descóbrenos a Compostela de Scórpio e tamén a Compostela de Carvalho, o seu autor; porque ao lermos Scórpio estamos a ler a vida de don Ricardo, e a maior parte dela transcorre en Compostela. É a cidade onde estuda, e máis tarde o espazo vital cando regresa como profesor do instituto e da USC. 

Alén dunha ampla información biográfica sobre Carvalho, froito dunha exhaustiva investigación do autor, a obra inclúe numerosas fotografías e tres itinerarios relacionados co escritor do último Día das Letras Galegas: «As rúas que transitan os protagonistas camiño dunha asemblea na Ferradura», «As rúas percorridas para iren decote á universidade» e «As rúas polas que pasa Carvalho Calero para ir dar clase á universidade. En Santiago de 1965 a 1980» que permiten realizar outros tantos percorridos, de forma virtual, a través das páxinas do libro, ou presencial, tomándoa como referencia.

O proxecto tivo a súa orixe nun dos roteiros literarios que Ferega está a incorporar como materiais didácticos relacionados con autores das Letras Galegas os últimos anos.