Celga é o acrónimo de Certificado de lingua galega e, por extensión, refírese ao sistema de certificación oficial do galego dependente da Secretaría Xeral da Lingua, o organismo da Xunta de Galicia que ten encomendada a dirección e xestión deste sistema.

O sistema estrutúrase nos seguintes niveis, que se corresponden, respectivamente, cos niveis A2, B1, B2, C1 e C2 do Marco europeo común de referencia para as linguas do Consello de Europa: Celga 1, Celga 2, Celga 3, Celga 4 e Celga 5. 

O sistema Celga ofrece probas para os niveis Celga 1, Celga 2, Celga 3 e Celga 4 (agás para o Celga 5, que só se pode obter por validación de estudos).  Cada ano, a Secretaría Xeral da Lingua publica no Diario Oficial de Galicia dúas convocatorias destas probas.

Os títulos Celga tamén se poden obter por validación de estudos.

Para a preparación das probas, a Secretaría Xeral da Lingua ofrece cursos que se adaptan ás circunstancias e necesidades das persoas candidatas. Poden ser presenciais ou a través da Plataforma de Teleformación, na que se imparten cursos en liña titorizados, de autoaprendizaxe e de Celga 2 en Lectura fácil.

A Plataforma de Teleformación da Secretaría Xeral da Lingua é un espazo virtual pensado para a formación en materia de lingua galega.

Para acceder a ela, se é a primeira vez, temos que rexistrarnos creando un usuario e un contrasinal. Para as seguintes veces, debemos poñer o usuario e o contrasinal que creamos.

Existen dúas modalidades: os cursos presenciais e os cursos en liña.

Os cursos en liña poden ser titorizados ou de autoaprendizaxe; a diferenza está en que os titorizados contan cunha persoa docente e os de autoaprendizaxe non.

Na modalidade presencial impártense Celga 2, Celga 3 e Celga 4.

Na modalidade en liña titorizados impártense Celga 2, Celga 3 e Celga 4.

Na modalidade en liña autoaprendizaxe están dispoñibles o Celga 1, Celga 2, Celga 2 en Lectura fácil, Celga 3 e Celga 4.

Cando se abre o prazo de inscrición, temos que cubrir a solicitude na Plataforma de Teleformación da Secretaría Xeral da Lingua. Pode solicitalos calquera persoa maior de 16 anos.

Se un curso ten máis solicitantes ca prazas dispoñibles, a asignación farase a través dun sorteo aleatorio puro.

Ao solicitar un curso, o sistema pídenos que realicemos unha proba de nivel para comprobar que é o adecuado para os nosos coñecementos previos de lingua galega.

Se o resultado da proba de nivel é apto, teremos preferencia na asignación das prazas do curso solicitado.

As probas de nivel están dispoñibles mentres estea aberto o prazo de presentación de solicitudes de inscrición.

Deberemos seguir as instrucións da persoa titora, xa que é quen nos vai indicar cales facer e os prazos de entrega.