Os máis cativos do colexio Veleiro-Docampo, de Castro de Rei, escribiron unha morea de contos de medo polo Samaín, e ademais ilustráronos cos seus propios debuxos. Nada mellor que xuntalos nunha mostra ben xeitosa para que poidades gozar deles.

Actividade do CEG da Habana. A Facultade de Artes e Letras da Universidade da Habana acolle o 10 de novembro unha actividade no marco do proxecto GALEUSCAT.

O alumnado da Universidade da Habana e público en xeral, pode participar na celebración dunha festa tradicional, que coincide co Samaín galego e o magosto, tamén co gastainerre vasco e a castanyada catalá. Cada territorio explicará a súa tradición específica de festexar esta data e haberá cancións do tempo do inverno así como degustación de produtos típicos desta época do ano (castañada, panellets, kalimotxo, queimada).

Ademais, ten lugar o concurso de contracapas sobre literatura galega, catalá e vasca.

Entre as diferentes actividades que realizou o CEIP Sárdoma - Moledo para conmemorar o Samaín atopamos estes vídeos nos que o alumnado de 5º e 6º nos ofrece unha arrepiante explicación da orixe desta celebración, os costumes típicos e os seres terroríficos que a acompañan; e o de 3º e 4º, a detallada elaboración de ricas receitas con cabaza.

Unha proposta xenial para o Samaín da profesora Monse García, do CPR La Inmaculada, que motiva o alumnado a escribir relatos de medo protagonizados por personaxes da nosa mitoloxía.

Nestes días previos á conmemoración do Samaín e á celebración dos magostos, o EDLG do CEIP López Ferreiro compilou, en colaboración coas familias, esta selección de refráns e ditos da tradición oral relacionados con estas datas. Algúns deles tamén se presentan en linguaxe pictográfica para que os poida entender o alumnado con dificultades de comunicación.

Radio Cristinuna, en colaboración co EDLG do CEIP Plurilingüe A Cristina de Carballo, comparte con toda a comunidade educativa esta compilación de recursos e materiais didácticos (tríptico, xogos, historias terroríficas...) especialmente útiles para traballar e festexar as vindeiras celebracións do Samaín e do Magosto.

Neste programa de Radio Monelos, o alumnado do centro coruñés explícanos, ademais do significado das palabras Samaín e Halloween, cal foi a orixe destas dúas tradicións e os aspectos que teñen en común. Un traballo moi ben documentado, que afonda nas características das dúas celebracións e nos axuda a diferencialas.

Neste catálogo do IES Terra de Turonio, ideado pola profesora de lingua galega, atopamos a explicación da nosa festa do Samaín e, aínda que disfrazarse non forma parte da tradición, se o queremos facer podémonos inspirar nalgunha das moitas figuras terroríficas de noso que nos presenta.

Na aula de medo da biblioteca do CEIP Ramón de Valenzuela, o alumnado de 6º representou este conto de temática moi acaída para o Samaín e que conseguiu divertir por igual a rapazada e a xente maior.

Sensibilizar o alumnado sobre o cambio climático e as súas consecuencias é unha prioridade nas aulas galegas, tamén no CEIP Ponte dos Brozos, que nos propón este genially no que se combina a temática ambiental coa do Samaín. No xogo, as nenas e os nenos deste centro arteixán deberán superar unha serie de retos para salvar o planeta Terra do meigallo dunha bruxa.