O secretario xeral de Política Lingüística presenta a programación deste ano
O programa de dinamización lingüística FalaRedes arranca a súa XII edición coa obra “Castelao”, que potencia a mirada feminina nas montaxes teatrais
Volver
A peza de Culturactiva Producións, que inaugura a programación do Falaredes 2023, está escrita, dirixida e interpretada por mulleres
A estrea será o vindeiro domingo 19 en Teo e durante o próximo mes visitará O Barco de Valdeorras, Viveiro, Boiro, Vilalba, Vilagarcía de Arousa, O Porriño, Monforte de Lemos e Porto do Son
Ao longo do ano sumaranse novas actividades de ocio en galego para distribuír entre os máis de 200 concellos membros da Rede de Dinamización Lingüística
Santiago de Compostela, 16 de marzo de 2023 Como cada ano a Xunta de Galicia bota a andar o programa de dinamización lingüística FalaRedes, pensado para encher o tempo de lecer con actividades en galego entre os máis de 200 concellos e agrupacións pertencentes á Rede de Dinamización Lingüística. Así o anunciou esta mañá en rolda de prensa o secretario xeral de Política Lingüística, Valentín García, quen participou na presentación da XII edición desta iniciativa, que abre a súa programación do 2023 coa peza Castelao, de Culturactiva Producións, escrita, dirixida e interpretada por mulleres.
O representante da Consellería de Cultura, Educación, FP e Universidades mostrouse satisfeito de abrir “o programa de dinamización lingüística FalaRedes 2023 cunha peza dedicada a Castelao cos obxectivos de fomentar o coñecemento dunha das figuras máis relevantes da cultura galega e en galego do século XX; potenciar a mirada feminina nas montaxes teatrais; promover o consumo de produtos culturais en galego do público familiar; proporcionarlles aos nenos e nenas unha experiencia de ocio positiva ligada á lingua galega e, en definitiva, contribuír á normalización e difusión da lingua galega nas idades máis novas e no contexto familiar e cultural”.
Canda Valentín García tamén interviñeron na presentación, que acolleu o compostelán Pazo de San Roque, as actrices Mónica Camaño e Cris Collazo, encargadas de dar vida ao propio Castelao e demais personaxes da peza.
Primeira obra sobre Castelao dirixida á cativada
Castelao é a primeira obra sobre o autor de Rianxo dirixida á infancia, en concreto a un público de seis a 10 anos e ás súas familias. Con texto de Paula Carballeira e dirección de Fina Calleja, a peza presenta un Castelao de oito anos feliz e aventureiro na súa vila natal.
Trátase dunha montaxe de ritmo trepidante na que a tensión dramática cabalga sobre o lombo dunha persecución polas rúas de Rianxo nas horas previas á partida cara Arxentina do escritor e a súa nai. Ademais, para facer aínda máis atractiva a representación, os diálogos de ficción introducen elementos marabillosos combinados con elementos recoñecibles da obra de Castelao, cos que o elenco, a música e o deseño de iluminación xogan creando un espectáculo cheo de plasticidade, cor e ritmo.
A obra estréase o vindeiro domingo 19 ás 12,00 h no Auditorio Constante Liste de Teo. Despois iniciará unha xira que a levará a visitar O Barco de Valdeorras (Auditorio Lauro Olmo) o 31 de marzo ás 19,30 h; Viveiro (Teatro Pastor Díaz) o 14 de abril ás 18,00 h; Boiro (Casa da Cultura Ramón Martínez López) o 15 de abril ás 19,00 h; Vilalba (Auditorio Carmen Estévez) o 16 de abril ás 18,00 h; Vilagarcía de Arousa (Auditorio Municipal) o 22 de abril ás 18,00h; O Porriño (Centro Cultural) o 28 de abril ás 17,00 h; Monforte de Lemos (Edificio Multiúsos) o 29 de abril ás 18,00 h e Porto do Son (Casa da Cultural de Portosín) o 30 de abril ás 19,30 h.
Como en cada actividade do FalaRedes, a entrada será de balde e a información completa pode consultarse no Portal da Lingua Galega.
Ademais, ao longo do ano a Consellería de Cultura seguirá engrosando a oferta de actividades de ocio en lingua galega para distrubuír entre os distintos concellos pertencentes á Rede de Dinamización Lingüística.