A Secretaría Xeral da Lingua e a Dirección Xeral de Ordenación e Innovación Educativa resolveron a convocatoria de participación nos proxectos de innovación educativa en dinamización lingüística para os centros docentes de titularidade pública da Consellería de Educación, Ciencia, Universidades e Formación Profesional durante o curso académico 2024/2025, na cal se establecen as bases reguladoras para realizalos.

Seleccionáronse os seguintes proxectos, aos que se lles recoñece a consideración de excelentes:

Proxecto	Centro	Concello	Provincia
Música e poesía: movendo a lingua	CMUS Profesional Xoán Montes + EOI de Lugo	Lugo	Lugo
VERSoamos	IES Coruxo + CEIPP Ría de Vigo + CMUS Profesional de Vigo	Vigo	Pontevedra
Gif menú: que vai ser?	IES de Sanxenxo	Sanxenxo	Pontevedra
Somos diferentes, somos referentes	IES do Milladoiro	Ames	A Coruña
Escollemos galego	IES San Clemente	Santiago de Compostela	A Coruña

Cada un destes cinco proxectos recibirá unha dotación económica de 2.000 € para o centro ou centros. O profesorado implicado activamente no seu desenvolvemento recibirá unha certificación de Primeiro Premio de Innovación Educativa, cunha equivalencia de 30 horas de formación permanente do profesorado para a persoa coordinadora e de 20 horas para o profesorado participante, alén da súa difusión a través da rede e da páxina web da Secretaría Xeral da Lingua.

Convocatoria

Os centros públicos admitidos no programa Proxectos de innovación educativa en dinamización lingüística, no marco do Plan Proxecta+, teñen a obriga de participar. Tamén se poderán presentar os demais centros docentes de titularidade pública da Consellería de Educación, Ciencia, Universidades e Formación Profesional.

Ao abeiro desta convocatoria, seleccionaranse cinco proxectos, que terán a consideración de excelentes; cada un deles recibirá unha dotación económica de 2 000 euros. Poderán concederse dúas mencións de honra, de ser o caso.

O profesorado implicado activamente no desenvolvemento dos cinco proxectos seleccionados recibirá unha certificación de Primeiro Premio de Innovación Educativa, cunha equivalencia de 20 horas de formación permanente do profesorado (30 para a persoa coordinadora). O persoal docente dos proxectos recoñecidos, de ser o caso, coa mención de honra recibirá unha certificación de Accésit.

O prazo de presentación das solicitudes, que se enviarán exclusivamente a través da Sede electrónica da Xunta de Galicia, rematará o día 14 de febreiro de 2025.