O Certame aRi(t)mar Galiza e Portugal é unha iniciativa do Equipo de Dinamización da Lingua Galega da EOI de Santiago de Compostela que se botou a andar por primeira vez no ano 2016.
Ten por obxectivo dar a coñecer e difundir cada ano a poesía e a música editadas no ano anterior en Galicia e en Portugal, amais de achegar as linguas e as culturas que configuran os dous territorios ás dúas beiras do Miño. Conta co apoio das secretarías xerais de Política Lingüística e de Cultura, no marco das accións coas que a Xunta de Galicia desenvolve a Lei Paz-Andrade.
Ten varias fases:
Nunha primeira, un xurado selecciona os 10 mellores poemas en galego, os 10 mellores poemas en portugués, as 10 mellores cancións en galego e as 10 mellores cancións en portugués.
Deseguido, realízanse as votacións virtuais para elixir canción e o poema gañadores de cada modalidade. E por último, en outubro, realízase a gala de entrega de premios.
No 2017 será a II edición. Neste momento xa comezou a segunda fase e calquera persoa pode acceder ao web da EOI de Santiago de Compostela para votar a mellor canción galega e a mellor canción portuguesa e ter a oportunidade de escoitalas todas. Animádevos!