A campaña, que forma parte dun plan máis amplo con medio cento de medidas para dinamizar e potenciar o galego en 2025, procura pór en valor o privilexio que supón contar cun idioma propio, un tesouro do que debemos sentirnos orgullosos e que debemos defender e preservar falándoo. Así pois, dende a cordialidade, convídanos a construír pontes por medio da lingua e mais a alimentar o arraigamento, o orgullo e o sentimento de pertenza a través dela.

Saca a lingua que levas dentro quere fomentar o uso do galego en todos os ámbitos -públicos e privados- e en todas as idades, aínda que fai fincapé na xente máis nova. Por iso centra a súa imaxe en persoas de diferentes xeracións, razas e estilos que aparecen tanto en situacións de lecer coma de traballo e mesmo inclúe famosos do cine, do deporte etc. Así mesmo, reflicte a actual realidade da nosa comunidade cos novos galegos e galegas provenientes do exterior.

A campaña mostra unha imaxe actual e moderna que recolle os cambios sociais que está a vivir Galicia e que poden supoñer un desafío para a nosa lingua, un reto que se propón asumir con ilusión e esperanza e mais coa alegría que dá traballar a prol do maior tesouro que temos os galegos.