FalaRedes tráevos este espectáculo de ilusionismo para todos os públicos.

O proxecto está desenvolto polo coñecido Mago Teto, que persegue con el tres obxectivos básicos:

• Darlles a coñecer ás novas xeracións unha figura que xa non é habitual e contribuír así ao mantemento do noso patrimonio.
• Poñer en valor as rutas do Camiño de Santiago como vías de comunicación, como medio económico para os afiadores e como elementos de transmisión e recepción de lingua e de cultura.
• Ofrecer un contido cultural de calidade a través da maxia, máis concretamente da maxia de rúa.
• Dinamizar o uso da lingua galega en contextos ligados á acción cultural.

O Camiño do Afiador xira arredor dunha roda de afiar dos anos 30, herdada polo Mago Teto dos seus devanceiros. O espectáculo fálanos dos afiadores que se desprazaban centos ou milleiros de quilómetros coa única compaña da súa roda dando lugar a mil historias e aventuras que agora o mago pon en escena coa axuda do ilusionismo.

Chegará a partir de agosto ás seguintes entidades: Cidade da Cultura de Galicia, Vilagarcía de Arousa, Monforte de Lemos, Boiro, Verín, Lalín, Arteixo, Sanxenxo e Festival de Cine de Cans.