O Consello da Cultura Galega organiza, co apoio da Secretaría Xeral da Lingua, os XXVII Encontros para a normalización lingüística, que se van desenvolver o martes, 21 de outubro, na sede desta institución no pazo de Raxoi, en Santiago de Compostela.

“Lingua en acción: pasado, presente e futuro dos equipos e servizos de normalización lingüística (EDLG e SNL)” é a temática desta xornada, que poñerá o foco no traballo destes axentes fundamentais no proceso de normalización do noso idioma, xa que a súa longa traxectoria demanda unha análise profunda, unha ollada atrás que nos permita analizar a súa situación actual e, sobre todo, que nos convide a mirar ao futuro.

Pola mañá abordarase o presente dos SNL da Administración pública galega, coa exposición de iniciativas que son exemplo de boas prácticas. Xa pola tarde, serán os representantes dos EDLG dos centros educativos os que amosen as súas experiencias, xunto a alumnado que participou ou participa en diferentes proxectos dos equipos.

A actuación de Regueifa Tour poñeralle o peche á xornada coa intervención dun grupo de adolescentes que nos amosarán o poder transformador da improvisación oral.