Tras o seu éxito con Estamos no verán!!! e A casa do terror, Xoán Curiel volve ao FalaRedes acompañado, desta volta, da contadora Charo Pita. Xuntos ofrecen un espectáculo que combina as narracións tradicionais coas cantigas  que don Antonio Fraguas, a quen este ano se lle dedicará o 17 de maio, recolleu nas súas Aportacións ao Cancioneiro de Cotobade . Deste xeito, FalaRedes 2019 ábrese cunha homenaxe ao autor das Letras Galegas deste ano.

Co obxectivo de que o público que ve o espectáculo poida seguir afondando na lectura en galego e no coñecemento do noso patrimonio lingüístico e literario unha vez que a actuación finalice, cada familia asistente recibirá antes de marchar unha pequena antoloxía de narracións tradicionais de Galicia escolmadas por Quique Harquindey e Maruxa Barrio titulada O fillo do rei e outros contos populares.

Dirixido a público de 6 a 12 anos e ás súas familias, Canta, miña pedra, canta, chegará esta primavera a 14 concellos da Rede de Dinamización Lingüística.