Documental sobre os celeiros palafíticos ou depósitos para gardar o gran elevados no chan por pés de pedra que foron achados en varios castros espallados pola xeografía galega e que podemos entender como os antecedentes máis antigos do que hoxe é un hórreo. O audiovisual detense nos aparecidos na escavación do Outeiro de Castro, xacemento localizado entre os concellos ourensáns de Baños de Molgas e Xunqueira e Ambía. A peza fai unha crónica dos tres anos de escavación, con testemuños do equipo arqueolóxico encargado destes traballos.