O secretario xeral da Lingua presentou a iniciativa deportiva co responsable do Festival Go! Go! Zo! e coa delegada da Federación Galega de Baloncesto en Santiago
A Xunta fomenta o uso do galego no deporte co apoio ao Torneo 3x3 que se celebrará no Monte do Gozo
Volver
Valentín García destaca “o valor desta atractiva iniciativa que conxuga lingua, deporte, mocidade e tempo de lecer”
No encontro poderase gozar de das propostas Cantigaéverso e María Faltri Picadiscos dentro da programación do ‘CulturON’ que este verán enche Galicia
Santiago de Compostela, 6 de setembro de 2024
O secretario xeral da Lingua, Valentín García, participou hoxe no Monte do Gozo na presentación do Torneo 3x3, impulsado no marco do Festival Go! Go! Zo! e pola Federación Galega de Baloncesto, co apoio da Xunta de Galicia a través das Consellerías de Cultura, Lingua e Xuventude e da Axencia de Turismo de Galicia.
O responsable da Lingua destacou na súa intervención “o valor desta atractiva e novidosa iniciativa” que conxuga lingua, deporte, mocidade e tempo de lecer a través de diferentes propostas. Entre elas, tal e como sinalou, están as que se inclúen dentro da programacion do CulturON da man de FalaRedes, a iniciativa da Xunta para promover e dinamizar o uso do galego”. Nesta liña, Valentín García animou a cidadanía, nomeadamente, ás familias con cativada, a achegarse ao Monte do Gozo durante a fin de semana.
Campionato e propostas lingüísticas e culturais para toda a familia
O campionato terá lugar este sábado 7 e domingo 8 de setembro a partir das 9,00 horas no Monte do Gozo e estenderase ata a noite. Á xornada sumaranse actividades para toda a familia con sesións DJ, Espazo FalaRedes, o Partido das Estrelas, inchables, concurso de triplas e sorteos. Deste xeito, o festival Go! Go! Zo! incorpora unha das novidades desta cuarta edición, o Torneo 3x3 da man da Federación Galega de Baloncesto, na que participarán preto de 300 persoas.
Cantigaéverso e María Faltri Picadiscos, da man do Espazo FalaRedes
Paralelamente ao campionato, a Pista 3x3 acollerá o Partido das Estrelas e un concurso de triplas e de habilidades. Ademais, a cativada poderá gozar tamén en espazos, como o escenario Xacobeo, con sesións DJ de música, no da Federación para resolver calquera dúbida co torneo, ou no Espazo FalaRedes, con animación, inchables e os concertos Cantigaéverso, sábado 7 ás 11,45 horas, e María Faltri Picadiscos, domingo 8 ás 12,45 horas.
Toda a información en www.gogozo.gal, e o regulamento e horarios do torneo en www.fegaba.com, así como nas súas redes sociais (@gogozofestival e @fegababaloncesto).