Silleda (Pontevedra), 2 de novembro de 2024

O conselleiro de Cultura, Lingua e Xuventude, José López Campos, defendeu hoxe a importancia de incrementar a presenza do galego na tecnoloxía e nos espazos dixitais de lecer que emprega a mocidade “como un xeito do máis eficaz para potenciar o uso da nosa lingua entre a xente máis nova”.

Fíxoo durante a súa visita á  festa de informática, de novas tecnoloxías e de lecer electrónico XGN Intermax, que se está a desenvolver estes días no recinto Feira internacional de Galicia Abanca, no municipio pontevedrés de Silleda. Precisamente, López Campos aproveitou para lembrar que unha das 50 medidas que porá en marcha en 2025 o Goberno galego para potenciar un maior uso do galego será “fomentar unha maior presenza do noso idioma nestas tecnoloxías tan empregadas pola xente moza”. Deste xeito, segundo salientou, demóstraselle á nosa mocidade “a utilidade que supón coñecer e empregar o galego, e incentivámola dun xeito amable e desde o lúdico”, valorou.