O conselleiro de Cultura, Lingua e Xuventude, acompañado polo secretario xeral da Lingua, presentou a iniciativa de dinamización no López Ferreiro de Santiago
López Campos destaca a implicación dos centros escolares coa lingua a través do programa ‘Falamos +’
Volver
A proposta, na que participan dez colexios das catro provincias, impulsa o uso da lingua con actividades lúdicas como son contos, teatro, xogos, lecturas ou música
Salienta que se trata de “fomentar o idioma entre a cativada desde a perspectiva do lecer nestes espazos de socialización, máis alá das horas lectivas”
Agradece “o esforzo das familias e profesionais que apostan por estas ferramentas a prol do galego, contribuíndo ao seu prestixio desde idades temperás”
Desenvólvese ata o día 28 deste mes e conta cun blog na web onde se van recollendo todas as accións realizadas
Santiago de Compostela, 18 de marzo de 2025
O conselleiro de Cultura, Lingua e Xuventude, José López Campos, acompañado polo secretario xeral da Lingua, Valentín García, presentou hoxe no colexio López Ferreiro, en Santiago de Compostela, o programa de dinamización lingüística Falamos +, no que participan dez centros repartidos polas catro provincias co obxectivo de “impulsar o uso da lingua galega entre a cativada desde a perspectiva do lecer dentro do ámbito escolar”.
Desta maneira, o representante da Xunta puntualizou que a iniciativa “responde ás liñas marcadas no Pacto pola Lingua, no que facemos fincapé no fomento do galego nos centros educativos máis alá das aulas, centrándonos en actividades de carácter lúdico”. Neste senso, engadiu, “temos en conta que os colexios, ademais das horas lectivas, constitúen espazos de socialización de grande importancia que nos dan a oportunidade de desenvolver este tipo de accións para chegar aos máis pequenos”.
Así, tal e como lembrou o responsable autonómico de Lingua durante a presentación, son os propios centros e as familias as que crean as propostas que “achegan o alumnado á nosa cultura e á nosa lingua actuando como protagonistas”. Deste xeito, durante tres semanas, que comezaron o pasado día 10 e finalizarán o 28 deste mes, o estudantado realiza diversas actividades, supervisadas pola coordinadora do programa, Pilar Ponte, que teñen que ver con monólogos, conversas, contos, teatro ou xogos.
A isto engádense outras temáticas como a ciencia ou as matemáticas, ao redor das que se realizan, por exemplo, xogos de lóxica. Por outra banda, a cativada de educación infantil e primaria tamén goza da escritura creativa, lecturas dramatizadas e mesmo do cante e o baile de música tradicional e moderna.
López Campos aproveitou o acto no colexio López Ferreiro para agradecer “o esforzo e implicación” dos centros, familias e profesionais que “apostan por estas ferramentas a prol da nosa lingua, contribuíndo ao seu prestixio e uso social desde idades temperás”.
Dez centros escolares
Os colexios participantes no programa Falamos + son, na provincia de Lugo, o Sagrado Corazón, de Ribadeo, e o Frei Luís de Granada, de Sarria. Na de Ourense toman parte na iniciativa o Ramón Otero Pedrayo, do Barco de Valdeorras, o colexio O Couto, na cidade das burgas, e o Virxe da Saleta, en San Cristovo de Cea. Pola súa parte, na provincia da Coruña interveñen o López Ferreiro e o Divino Maestro, de Santiago de Compostela, o Atios, de Valdoviño, e o Virxe de Cela, de Monfero. En Pontevedra, participa o colexio Alfonso VII, de Caldas de Rei.
Todos eles achegarán a súa experiencia a través dun blog que actúa como fío condutor desta iniciativa, no que irán amosando as diferentes atividades desenvolvidas en cada unha das xornadas do programa.