Santiago de Compostela, 7 de outubro de 2025

O secretario xeral da Lingua, Valentín García, enxalzou hoxe “a posta en valor das nosas tradicións, identidade e cultura mediante iniciativas como o IV Premio de Novela da Galicia Rural”. Fíxoo durante a presentación das bases do galardón que se celebrou esta mañá no Pazo de San Roque.

O representante da Consellería de Cultura, Lingua e Xuventude destacou a potencialidade deste certame “para promover a visibilidade do mundo rural galego e reflexionar sobre a súas problemáticas, posibilidades e retos presentes e futuros a través da creación literaria”. Neste senso, as novelas presentadas deben situar a súa trama na Galicia rural ou concederlle a esta un protagonismo relevante na narración, ademais de estar escritas en lingua galega.

As obras, que deben ter unha extensión mínima de 150.000 caracteres e máxima de 300.000 caracteres, teñen que ser presentadas en formato PDF nunha memoria USB con título e lema. Ademais, enviaranse nun sobre pechado á sede do concello de San Xoán de Río antes do 15 de xaneiro de 2026.

O ditame do xurado, formado por cinco persoas pertencentes ao ámbito da crítica, a escrita, o ensino e o estudo da lingua galega, farase público no mes de marzo de 2026 e establécese un único premio dotado con 3.000 euros.

Valentín García destacou o carácter universal da convocatoria “que vai dirixida tanto a autores xa consagrados como a novos talentos da literatura que, coas súas novelas queiran poñer en contacto aos lectores co presente, o pasado e o futuro do rural galego”. Neste senso, reafirmou o compromiso do Goberno Galego coa defensa da lingua galega e a promoción das actividades culturais no ámbito local.