Santiago de Compostela, 15 de xaneiro de 2026

A Xunta de Galicia vén de apoiar a produción de Os Balbinos, liña de editorial de libros adaptados en lectura fácil. Así se deu a coñecer na presentación dos libros Os Balbinos visitan os museos naturais de Galicia, Os Balbinos visitan os pazos de Galicia e A Lúa e a Bal gústalles a música, de Xoán Carlos García Porral, Toño Núñez e ilustrados por Gabriel Iglesias Sanmartín, á que asistiron o secretario xeral da Lingua, Valentín García, e o director xeral de Cultura, Anxo M. Lorenzo.

Así, estas obras viron á luz co apoio dunha liña de axudas para a produción editorial en lectura fácil en galego impulsada pola Consellería de Cultura, Lingua e Xuventude desde 2023. Trátase dunha iniciativa na liña da Lei de cultura inclusiva e accesible de Galicia, unha normativa pioneira en Europa que afonda na eliminación de barreiras físicas, cognitivas, comunicativas, sociais e territoriais.

Neste senso, a Xunta de Galicia leva investido máis de 100.000 euros co obxectivo de incentivar ás empresas do sector editorial para que incrementen a produción de libros que favorezan tanto a dixitalización como o acceso universal á cultura, a través da posta no mercado de libros en formato de lectura fácil.

Cómpre lembrar que a lectura fácil é un método de redacción que permite entender mellor a información, presentando os contidos dunha maneira máis sinxela, tanto no referido á linguaxe como ao formato no que se presenta. Trátase dunha ferramenta no só destinada ao apoio de persoas con discapacidade intelectual, senón que tamén axuda a moitos outros segmentos da poboación que presentan dificultades de lectura e comprensión, como as persoas migrantes ou as persoas con dificultades de comprensión.