Santiago de Compostela, 25 de xuño de 2026

O secretario xeral da Lingua, Valentín García, presentou hoxe o obradoiro De vacas: humor, rentraca e nova oralidade, impartido por este grupo musical coa que a Xunta procura “dinamizar o galego no repertorio das corais galegas  e a transmisión interxeracional do idioma desde o ámbito musical”.

Con este dobre obxectivo, o representante da Consellería de Cultura, Lingua e Xuventude puxo en valor esta iniciativa que, segundo adiantou, contará con catro obradoiros que se desenvolverán de xuño a outubro, “impartidos por unha das formacións que está contribuíndo a un maior emprego da nosa lingua, sobre todo entre as xeracións máis novas, con versións en galego retranqueiras de grandes éxitos comerciais”.

Neste senso, Valentín García tamén destacou o feito de que esta actividade vai supor poñer en contacto a agrupacións musicais de diferente xeracións e repertorios “co que non só estamos ante un proxecto puramente formativo, senón ante un enriquecedor intercambio de perspectivas, de xeitos de traballar e de facer fronte á proxectos que vai ser moi positivo para ambas as dúas partes”, asegurou.

Catro obradoiros de xuño a outubro

O secretario xeral da Lingua explicou que, tal e como indica o nome do obradoiro, o “humor, retranca e nova oralidade serán a cerna destes talleres” impartidos polo coñecido grupo De Vacas, do que lembrou que está a celebrar neste 2026 o seu décimo aniversario. En concreto, impartirá esta formación entre as agrupacións corais Canta Noia, que se desenvolverá nesta mesma localidade coruñesa; a Organización Musical Carlos Barruso, que terá lugar no municipio lucense de Outeiro de Rei; a  Os d'aquí, que se impartirá no concello de Meira (Lugo), e ao Son Outeiro e Coral de Vilaxoán, que terá lugar en Vilagarcía de Arousa (Pontevedra).

A actividade céntrase no traballo do repertorio característico da formación De Vacas con letras con retranca, perspectiva de xénero, harmonización de cancións modernas e uso do galego, que se reforzará como ferramentas expresivas contemporáneas. Deste xeito, durante o obradoiro, as persoas participantes experimentarán coa oralidade, xogando coa palabra, o ritmo e a intención comunicativa para transformar temas coñecidos en pezas corais.