O XIII Certame Galego de Bandas Populares congrega esta fin de semana en Santiago 1300 músicos de 21 formacións

Volver

A Xunta colabora coa Federación Galega de Bandas de Música Populares na organización do evento, que terá lugar no Auditorio de Galicia os días 2 e 3

Será a edición máis numerosa e internacional da iniciativa, coa participación de catro agrupacións portuguesas, unha castelá e 16 galegas

Santiago de Compostela, 30 de outubro de 2019.- A Federación Galega de Bandas de Música Populares (FGBMP) organiza esta fin de semana en Santiago a décimo terceira edición do seu Certame Galego de Bandas de Música Populares, que será a máis internacional e numerosa de todas as celebradas ata o momento. Como en anos anteriores, a Consellería de Cultura e Turismo colabora no desenvolvemento deste evento, que os vindeiro días 2 e 3 de novembro congregará no Auditorio de Galicia 1300 músicos de 21 formacións, das que 16 son galegas, catro portuguesas e outra de Castela e León.

Así o expuxo esta mañá o director da Axencia Galega das Industrias Culturais (Agadic), Jacobo Sutil, na presentación do encontro na Cidade da Cultura de Galicia, durante a que tamén interviñeron a concelleira de Acción Cultural de Santiago, Mercedes Rosón, e o presidente da FGBMP, Iván Estévez. Asistiu tamén ao acto o secretario xeral de Política Lingüística, Valentín García, e unha representación das agrupacións que actuarán esta fin de semana en Santiago.

A participación da Xunta nesta iniciativa enmárcase na liña de traballo conxunto que vén desenvolvendo desde hai anos canda a Federación, que actualmente está integrada por 93 bandas das catro provincias, superando os 7000 músicos asociados. Neta colaboración enmárcase igualmente o Concurso Galego de Composición para Bandas, que vai xa pola súa duodécima entrega, e mais o Festival de Bandas Infantís e Xuvenís que se celebra cada ano na Cidade da Cultura.

Recoñecementos internacionais para Galicia

Respecto ao Certame Galego de Bandas, que será retransmitido en directo a través da canle da FGBMP en YouTube, nesta 13ª edición avánzase nas novidades introducidas en 2018 para abrirse á participación de bandas doutros puntos da Península, neste caso procedentes de Benavente e de Portugal. Xunto con elas, unha importante representación galega dará conta do bo momento que están a vivir as bandas na nosa Comunidade e da súa proxección exterior, con recoñecementos como o recente primeiro premio obtido pola Banda de Música Municipal de Caldas de Reis no Certame Internacional de Bandas de Música Villa de Aranda ou o da Banda unión Musical de Meaño no Concurso Bandístico Internacional Rival da Garda, en Italia.

Así mesmo, continuarase coa distinción instaurada o ano pasado para premiar o mellor director do certame, en colaboración coa Escola Galega de Dirección de Banda, e mais coa última estrutura da competición clasificada en cinco seccións: infantil, xuvenil, primeira, segunda e terceira.

Os mestres Frank de Vuyst, Laurence Roman e Luis Serrano Alarcón son os integrantes do xurado, que dará a coñecer o nome das formacións gañadoras durante o acto de clausura do domingo. Concederanse tres premios para cada unha das categorías, con diferentes dotacións que suman 23.475 euros, e tamén se poderá outorgar en cada sección (agás na infantil) un recoñecemento económico á mellor interpretación dunha obra galega.

XII Concurso Galego de Composición

Entre as obras de autoría galega de obrigada interpretación, están as premiadas o ano pasado no Concurso Galego de Composición, do mesmo xeito que as gañadoras da actual edición –que se anunciarán igualmente durante a cerimonia de clausura– serán estreadas e executadas no Certame de Bandas de Música de 2020.

Coa organización destes premios de composición, a FGBMP busca cubrir a escaseza de pezas galegas para seren interpretadas especificamente por este tipo de agrupacións, dispoñendo xa dun amplo catálogo para a súa progresiva incorporación por parte das bandas federadas.

Departamento: Tema: Cultura, Lingua