Serán destinatarias destas bolsas as persoas graduadas universitarias nas titulacións exixidas nos proxectos de investigación que se inclúen no anexo I e nel detállanse os requisitos específicos que cómpre reunir, coa finalidade de contribuír á especialización na súa formación académica, profesional ou investigadora.

As actividades de formación iniciaranse coa incorporación da persoa seleccionada, tal e como dispón a base décimo cuarta desta convocatoria. A data estimada de comezo é o 1 de decembro de 2026 e rematarán, en calquera caso, o 30 de novembro de 2028.

As solicitudes presentaranse obrigatoriamente por medios electrónicos a través do formulario dispoñible na sede electrónica da Xunta de Galicia. O prazo de presentación das solicitudes será dun mes, contado a partir do seguinte ao da publicación desta orde no Diario Oficial de Galicia: comezará o 23 de xuño e rematará o 22 de xullo.