A partir das 10.30 h do vindeiro 18 de xuño, a praza Jorge Mira de Baio acollerá arredor de mil estudantes de 14 centros da Costa da Morte, para participar na gala de clausura de Falemos + Galego. A iniciativa pretende, ademais de fortalecer o orgullo de pertenza á comarca, promover o uso e o prestixio social da lingua galega entre a mocidade a través de vídeos e lemas dinamizadores.

Alén da actuación de 9Louro, tamén actuarán As caramiñas do IES Pedra da Aguia, as pandeireteiras do CPI de Zas, as pandeireteiras da Asociación Cultural Tinxideiras do CPI da Picota e o grupo de gaiteiros do IES Maximino Romero de Lema.

Parabéns e agradecementos á dirección e ao EDLG do instituto organizador desta terceira edición, o IES Maximino Romero de Lema, e mais ao resto de profesorado e alumnado de todos os centros participantes pola súa implicación neste proxecto.