Ata min os ríos chegan
e por min os barcos van.
Como unha manta turquesa
de auga cubro o planeta.
(Mar)

Gústame andar de lado
para cazar un descoidado,
de cor louro no océano
rubio estou no prato.
(Caranguexo)

Na terra teño un curmán
pero eu estou feliz no mar,
cabalgo nas augas calmas
e agóchome nas algas.
(Cabaliño de mar)

Teño oito patas grosas
cheas de ventosas,
arrolado polas ondas
paseo entre as rochas.
(Polbo)

As augas calmas decoro
coa miña linda cor,
ollo para o ceo á noitiña
e da familia sinto morriña.
(Estrela de mar)