Espectáculo-obradoiro de xogos, monicreques, música e tradición oral para familias con rapaces maiores de dous anos.

A eira do paporrubio desenvólvese nun espazo soñador e máxico onde conviven animais domésticos e non tan domésticos, que serán os protagonistas das fábulas.

As galiñas andan esfameadas agardando polo millo que celosamente coida o espantallo. O ratiño coñece o lugar secreto onde se gardan os mellores queixos. A raposa anda axexando un despiste do can de palleiro, que é o encargado de poñer orde nesta rebuldeira eira. Na aldea dos paxaros hai sempre cantos, bailes e contos. O boi marelo sempre anda a presumir dos seus cornos, a ra de santón come un día si e outro non e os lagartos pasan o día a tomar o sol mentres os sapoconchos andan ás carreiras.

Soa un acordeón… o paporrubio sae da súa casa cos zocos de bailar. Nenos e nenas, benvidos ao espectáculo!

O proxecto, desenvolvido por Luchi Iglesias e Carlos Quintá dentro do Fondo de Proxectos Culturais Xacobeo 21, mestura música e xogos tradicionais con outros de creación propia que farán que os nenos e nenas gocen dunha divertida xornada descubrindo os segredos e costumes da vida na eira.

A actividade comeza a súa andaina dentro do FalaRedes o 11 de agosto na Cidade da Cultura de Galicia, de 18:00 a 20:00 horas. Nas seguintes semanas, fará parada en Brión e Porriño.

 

Axenda de FalaRedes 2021. A eira do paporrubio
Data e hora	Lugar	Concello	Provincia
Mércores 11 de agosto, ás 12:00 horas	Cidade da Cultura	Santiago de Compostela	A Coruña
Domingo, 5 de setembro, ás 12:00 horas	Carballeira de Santa Minia	Brión	A Coruña
Sábado 11 de setembro, ás 11:00 horas	Praza Arquitecto Antonio Palacios	O Porriño	Pontevedra