A Xunta de Galicia, a través da Secretaría Xeral da Lingua, súmase a esta festa que, cada 26 de setembro, nos lembra a importancia e mais a necesidade de preservar e fomentar a rica diversidade cultural e lingüística de Europa, así como de incrementar o grao de entendemento intercultural e lingüístico a través do impulso da aprendizaxe de linguas. Como nos últimos anos, este 2025 faino mediante un acto institucional nos que inclúe un recitado multilingüe de poemas a cargo de alumnado de ESO e de bacharelato, alumnado que poderá ser secundado a seguir polo público asistente que desexe compartir a súa lectura. O acto celebrarase ás 18.00 horas nos soportais do Museo das Peregrinacións, na praza de Praterías de Santiago de Compostela.

Obxectivos da celebración

Os obxectivos xerais do Día Europeo das Linguas son:

• Destacar a importancia da aprendizaxe de linguas e diversificar a variedade de idiomas que se aprenden co obxectivo de incrementar o plurilingüismo e a comunicación intercultural.
• Promover a riqueza da diversidade lingüística e cultural de Europa, que debemos preservar e potenciar.
• Promover a aprendizaxe permanente de linguas tanto dentro como fóra dos centros educativos.

 Este ano, o Consello de Europa propón celebrar o Día Europeo das Linguas baixo o lema "Os idiomas abren corazóns e mentes!".

Diversidade lingüística en Europa

• En todo o continente europeo existen máis de 225 linguas nativas.
• A Unión Europea é a institución do mundo máis plurilingüe ao recoñecer 24 linguas oficiais, ás que cómpre sumar arredor de 60 linguas denominadas rexionais ou minoritarias.
• Por outra banda, no territorio da Unión fálanse algo máis de 100 linguas procedentes doutros continentes do mundo que usan a diario persoas inmigrantes.