Segundo a Enquisa estrutural a fogares 2023, elaborada polo Instituto Galego de Estatística, tres cuartas partes da poboación censada en Galicia fala o galego en maior ou menor medida, o que quere dicir que arredor de dous millóns de persoas usan habitualmente a lingua propia de Galicia na súa vida diaria (relacións familiares, sociais, laborais etc.).

É verdade que preocupan os índices de falantes novos e o mantemento da transmisión interxeracional nas cidades máis grandes de Galicia, pero, paralelamente, é innegable que existen puntos fortes á hora de facer unha análise obxectiva:

• Tres cuartas partes da poboación fala o galego en maior ou menor medida, algo que sucede en moi poucas comunidades cunha lingua minoritaria.

• O nivel de coñecemento da lingua propia de Galicia é moi elevado: máis dun 83% da poboación manifesta saber falar o galego e mais dun 93% afirma comprendelo.

• En certos ámbitos, como o consumo de prensa ou a navegación en Internet, incrementouse o uso do galego.

• Aumentou o número de fogares onde se empregan tanto o galego coma o castelán.