Vinte puntos de Ourense conforman o roteiro literario de Carlos Casares na cidade que o veu nacer en 1941. Lugares de estudo, formación e tertulia e escenarios que aparecen como paisaxe da súa produción literaria forman parte do percorrido, inaugurado o sábado 11 de febreiro coa presenza do presidente da Fundación Carlos Casares, Xavier Casares Mouriño, o conselleiro de Cultura, Román Rodríguez, e o alcalde da cidade, Xesús Vázquez, entre outras autoridades.
A ruta foi deseñada polo escritor e investigador Afonso Vázquez-Monxardín, co apoio da Fundación, o Concello e a Xunta, e marca con placas de cerámica vinte puntos transcendentais na traxectoria vital e literaria do autor homenaxeado no Día das Letras Galegas 2017. A través desta iniciativa pode coñecerse camiñando unha parte apreciable do universo creativo de Casares, e seguir os seus pasos como escritor e xornalista en formación.
Unha boa iniciativa para o alumnado e o profesorado. Axiña estará dispoñible unha aplicación para móbil.