Para conmemorar o Día de Rosalía, este ano no CEIP Plurilingüe Profesor Albino Núñez crearon unha exposición titulada "O herbario de Rosalía", relacionando así esta conmemoración coa temática do PDI: Natusabios.

O alumnado escribiu en flores de cartolina nomes de árbores, plantas, herbas, flores..., das que aparecen no libro O herbario de Rosalía publicado pola Fundación Rosalía de Castro no ano 2022. Para completar o herbario buscaron unha mostra dalgunhas desas plantas na contorna do centro e para traballar o vocabulario elaboraron desde o EDLG uns bingos para xogar co alumnado nas aulas de lingua galega. Son catro bingos (un para EI, outro para 1º ciclo, outro para 2º ciclo e outro para 3º ciclo).

O xogo segue a dinámica do bingo tradicional: un alumno/a ou o mestre/a vai sacando dunha bolsa unha imaxe tras outra e di o seu nome en alto; os alumnos/as que a teñan no seu cartón deberán de marcala e así ata que alguén complete o seu cartón primeiro; nese momento deberá dicir "bingo", compróbase que está correcto e volve facerse outra rolda. Cada mestre/a decide a duración do xogo.