Programa FALAMOS +
Falamos + é un programa que quere dinamizar a utilización activa do galego nos centros de ensino a través de propostas de carácter lúdico creadas polos propios centros e as familias que acheguen o alumnado e as súas familias ao patrimonio cultural galego tradicional e especialmente a aquel máis moderno e descoñecido para a maior parte do alumnado.
Ao longo de tres semanas, dez centros educativos de educación infantil e primaria das catro provincias galegas uniranse para vivir como galegofalantes e crear, cunha participación protagonista do seu alumnado, propostas lúdicas de lecer en galego dirixidas a educación infantil e aos tres ciclos de educación primaria e desenvoltas nos tempos de lecer da xornada lectiva. O programa está coordinado pola profesora Pilar Ponte Patiño.
Contidos
- Os luns falamos (conversas, monólogos, contos, lendas, teatro...)
- Os martes xogamos (xogos de todos os tipos incluíndo xogos de lingua como pasagalegos, tabús, adiviñas…)
- Os mércores facemos ciencia (levamos a cabo propostas lúdicas relacionadas con diferentes disciplinas científicas, xogos de lóxica matemática, de química…)
- Os xoves escribimos e lemos (xogos de escritura creativa, lecturas dramatizadas e propostas de lectura de todos os tipos e para todas as idades)
- Os venres cantamos e bailamos (botamos man de temas musicais tradicionais e modernos para bailalos e cantalos)
Temporalización
Esta iniciativa educativa terá unha duración de 15 días lectivos e desenvolverase entre o 10 e o 28 de marzo de 2025.
Forma de organización
O programa terá un blog como fío condutor onde se irán amosando as diferentes propostas de actividades dos centros participantes en cada unha das xornadas.
Cada centro adquire os seguintes compromisos:
- Desenvolver un programa lúdico para o seu centro durante os quince días lectivos que dura o programa.
- Colaborar no blog do programa cos contidos de un día e medio.
Os centros recibirán apoio para o desenvolvemento do programa, material promocional e un concerto de Cé Orquestra Pantasma.
10 CENTROS PARTICIPANTES
CPI Plurilingüe Alfonso VII, Caldas de Reis (Pontevedra)
CPR Sagrado Corazón, Ribadeo (Lugo)
CEIP Frei Luís de Granada, Sarria (Lugo)
CEIP Ramón Otero Pedrayo, O Barco de Valdeorras (Ourense)
CEIP O Couto (Ourense)
CPI Virxe da Saleta, San Cristovo de Cea (Ourense)
CEIP de Prácticas López Ferreiro, Santiago (A Coruña)
CPI de Atios, Valdoviño (A Coruña)
CPI Virxe da Cela, Monfero (A Coruña)
Colexio Divino Maestro, Santiago (A Coruña)