Os Axóuxeres 2010-2011
Os Axóuxeres é unha iniciativa da Secretaría Xeral de Política Lingüística que botou a andar o 4 de setembro. Trátase dun programa de dinamización lingüística dirixido a bebés de 0 a 3 anos que, mediante o xogo, a música e a experiencia sensorial, busca favorecer a incorporación do galego á comunicación entre as familias e os bebés.
A través dos tres formatos dos que consta esta nova edición (Festas, Obradoiros e Encontros), o programa Os Axóuxeres quere axudar a que os pais e as nais contribúan á cadea de transmisión da lingua e, á vez, obteñan ideas para xogar na casa, prolongando no fogar a propia actividade. Nesta ocasión, a iniciativa homenaxeará os avós, en recoñecemento polo seu labor de coidado, educación e transmisión da lingua aos máis pequenos.
