Volver

Día internacional da Lingua Materna

Día internacional da Lingua Materna

O Día Internacional da Lingua Materna foi proclamado pola Conferencia Xeral da UNESCO en novembro de 1999 e celébrase anualmente dende o 21 de febreiro de 2000 cos obxectivos de promover o multilingüismo e a diversidade cultural. A Xunta de Galicia e a Rede de Dinamización Lingüística veñen sumándose nos últimos anos a esta celebración, contextualizándoa na nosa comunidade e orientándoa á promoción e transmisión da lingua galega.

  • Día internacional da Lingua Materna

    Día internacional da Lingua Materna

A lingua materna é aquela en que os nenos aprenden a falar e a relacionarse co seu contorno máis próximo. A UNESCO quere impulsar o coñecemento e a práctica das linguas maternas en todo o mundo tamén na escola, nos medios de comunicación, na internet... fóra dos ámbitos en que moitas delas quedan recluídas. O Día Internacional da Lingua Materna estableceuse para sensibilizar acerca da importancia dos idiomas e da función vital que desempeñan no desenvolvemento, ao garantir a diversidade e o diálogo intercultural, así como o fortalecemento da cooperación e a consecución da educación de calidade para todos, a construción de sociedades do coñecemento integradoras e a preservación do patrimonio cultural.

Celebración en Galicia

A Xunta de Galicia e a Rede de Dinamización Lingüística celebran o día 21 de febreiro a festa da Lingua Materna no concello de Santiago de Compostela e, máis en concreto, nunha das escolas da rede “A galiña azul” que a Xunta ten neste municipio, a de Tras Parlamento. Deste xeito, o acto serve tamén de homenaxe e recordo ao escritor Carlos Casares, a quen se lle dedicará este ano as Letras Galegas. Casares foi un dos iniciadores da literatura infantil precisamente co libriño de relatos A galiña azul, que lle dá nome ás escolas da Xunta, unha obra que el escribiu para que os rapaces e rapazas puidesen ler na súa lingua e na que están presentes a defensa da lingua, a importancia das diferenzas ou a liberdade de expresión.

A celebración consiste nun breve acto institucional no que participan os conselleiros de Cultura e Educación e mais de Política Social seguido cunha actividade de dinamización lingüística para nenos e nenas de 0 a 3 anos e as súas familias. A actividade, desta volta, corre a cargo do coñecido cantante de música infantil Pablo Díaz e a súa banda, que empregan o engado das músicas do seu disco Xente miúda, moita fartura para interactuar cos nenos e nenas e mais coas súas familias.

Cara a un futuro sustentable a través da educación multilingüe

Cada ano, a UNESCO escolle un lema arredor do que xira a conmemoración do Día Internacional da Lingua Materna. No 2017 o lema é “Cara a un futuro sustentable a través da educación multilingüe”. Con el quérese destacar que o uso das linguas maternas no marco dun enfoque plurilingüe é un compoñente esencial da educación de calidade, que é a base para empoderar as mulleres, os homes e as súas sociedades. Tal e como se recolle na mensaxe da directora xeral da UNESCO, Irina Bokova, “a educación e a información en lingua materna son esenciais para mellorar a aprendizaxe e fomentar a confianza e a autoestima, que son algúns dos principais motores do desenvolvemento”. Por iso, “canto máis saibamos valorar as linguas, máis ferramentas teremos para construír un futuro digno para todos”.