Volver

Día internacional da Lingua Materna

Día internacional da Lingua Materna

A lingua materna é aquela en que os nenos aprenden a falar. En palabras de Manuel María, autor a quen se lle dedicará o próximo Día das Letras Galegas, “é a chave coa que abrimos o mundo”. En efecto, os idiomas son moito máis que simples medios de comunicación, porque a cultura e a identidade van unidas á fala arredor da que se constrúen. Por iso, no ano 1999, a Conferencia Xeral da UNESCO acordou declarar o 21 de febreiro Día Internacional da Lingua Materna.

  • Día internacional da Lingua Materna

    Día internacional da Lingua Materna

O obxectivo desta celebración é impulsar o coñecemento e a práctica das linguas maternas en todo o mundo e, en especial, as das minorías. A UNESCO entende que a difusión das linguas maternas minoritarias serve para incentivar, ademais do pluralismo lingüístico, a diversidade cultural, que se interpreta como un activo para o desenvolvemento dos individuos e dos pobos.

A Xunta de Galicia e a Rede de Dinamización Lingüística (RDL) veñen sumándose nos últimos anos a esta celebración, contextualizándoa na nosa comunidade e orientándoa á promoción da transmisión familiar da lingua galega.

Ambas as institucións celebrarán esta fin de semana un acto institucional en Melide con intervención da alcaldesa da vila, Dalia García, e do secretario xeral de Política Lingüística, Valentín García, acto que irá seguido dunha actividade de dinamización para a cativada do concello e as súas familias. Trátase de Gatuxo, un espectáculo músico-teatral para bebés de Magín Blanco e de Raquel Queizás, que aborda o tema do crecemento do cativo e do descubrimento do mundo.

Por parte, o programa de dinamización lingüística FalaRedes ábrese este sábado en Ourense coa actividade Todo me fala de ti no marco da celebración da Lingua Materna deste concello, á que acudirán o conselleiro de Cultura e Educación e o presidente da Rede de Dinamización Lingüística.

 

Educación de calidade, linguas de instrución e resultados da aprendizaxe

Cada ano, a UNESCO escolle un lema arredor do que xira a conmemoración do Día internacional da Lingua Materna. No 2016 o lema é “Educación de calidade, lingua(s) de instrución e resultados de aprendizaxe”. Con el quérese poñer de relevo a importancia das linguas maternas para a educación de calidade a diversidade lingüística. En palabras de Irina Bokova, directora xeral da UNESCO, “o uso das linguas maternas no marco dun enfoque plurilingüe é un compoñente esencial da educación de calidade, que é a base para empoderar as mullleres e os homes e as súas sociedades. Debemos recoñecer e promover este potencial para non deixar a ninguén rezagado e construír un futuro máis xusto e sustentable para todos”.