A Xunta de Galicia, a través da Secretaría Xeral da Lingua, súmase a esta celebración que, cada 26 de setembro, nos lembra a importancia e mais a necesidade de preservar e fomentar a rica diversidade cultural e lingüística de Europa, así como de incrementar o grao de entendemento intercultural e lingüístico a través do impulso da aprendizaxe de linguas. Como nos últimos anos, este 2026 faino mediante un acto institucional que inclúe a lectura de textos dramatizados e de poemas a cargo de alumnado do IES Xelmírez II de Santiago de Compostela, alumnado que poderá ser secundado a seguir polo público asistente que desexe compartir a súa lectura. Haberá ademais unha exposición de libros editados pola Secretaría Xeral da Lingua, que os participantes poderán levar consigo ao finalizar o acto. Este terá lugar o venres 25 de setembro, na véspera do Día Europeo das Linguas, nos soportais do Museo das Peregrinacións, na praza compostelá de Praterías, ás 19:00 horas.

Obxectivos da celebración

Os obxectivos xerais do Día Europeo das Linguas son:

• Destacar a importancia da aprendizaxe de linguas e diversificar a variedade de idiomas que se aprenden co obxectivo de incrementar o plurilingüismo e a comunicación intercultural.
• Promover a riqueza da diversidade lingüística e cultural de Europa, que debemos preservar e potenciar.
• Promover a aprendizaxe permanente de linguas tanto dentro como fóra dos centros educativos.

 Este ano, o Consello de Europa propón celebrar o Día Europeo das Linguas baixo o lema "As linguas únennos!". Faino co convencemento de que os idiomas son un medio poderoso para fomentar a comprensión intercultural e un compoñente fundamental do rico patrimonio cultural de Europa.

Diversidade lingüística en Europa

• En todo o continente europeo existen máis de 225 linguas nativas.
• A Unión Europea é a institución do mundo máis plurilingüe ao recoñecer 24 linguas oficiais, ás que cómpre sumar arredor de 60 linguas denominadas rexionais ou minoritarias.
• Por outra banda, no territorio da Unión fálanse algo máis de 100 linguas procedentes doutros continentes do mundo que usan a diario persoas inmigrantes.