Volver

Ciencia en galego

Ciencia en galego

Dende que, no ano 2001, a UNESCO declarase o 10 de Santos como Día Mundial da Ciencia para a Paz e o Desenvolvemento, novembro pasou a ser para todos nós o Mes da Ciencia. En consonancia con isto, dende hai sete anos o profesorado de Galicia comezou a celebrar o 4 de novembro o Día da Ciencia en Galego. O obxectivo desta conmemoración é o de mostrar que a lingua galega é útil e tan válida como calquera outra para facer pescuda e divulgación científica e, polo tanto, tamén para o ensino das máis diversas disciplinas científicas.

Cada ano Igaciencia (Institución Galega de Ciencia) propón dous científicos, un galego e outro estranxeiro, aos que dedicarlle o Día da Ciencia en Galego. Tendo en conta que a ONU decidiu declarar o 2017 como Ano internacional do turismo sostible, acordaron centrar a celebración deste ano nas viaxes científicas e lembrar, así, a viaxe de ciencia máis famosa da historia -a que Charles Darwin fixo a bordo do Beagle e que estaría no xerme da súa teoría da evolución- e mais o periplo arredor de Galicia iniciado hai 200 anos por Domingo Fontán para elaborar a súa Carta Xeométrica, o primeiro mapa moderno de Galicia, deseñado con métodos matemáticos e exactos.

A Consellería de Cultura e Educación celebra o venres 10 de novembro no CPI Domingo Fontán de Portas un acto conmemorativo do mes da Ciencia en Galego que inclúe unha ofrenda floral ante o Busto do ilustre xeógrafo e unha actividade de dinamización lingüística para os rapaces e rapazas do centro educativo.